A zebra de Grevy (Equus grevyi (Oustalet, 1882)) ye una zebra en grau recesión d'o centro-este d'Africa. Ye la más gran de todas las zebras y tien muitas rayas verticals que son muit chuntas, más que no en as altras especies, y tamién as orellas grans y redondas que la fan de reconoixer quan la se veye. Anque ye de plano más gran y más fuerte que no la zebra d'as planas, ye más deficil d'entrenar-la, por lo que nunca no la s'ha mirato de domesticar.
Una carateristica social d'a zebra de Grevy ye que por contra de como fan as altras especies de zebras, os mastos d'ésta no forman harems. A suya estratechia ye prener lo control d'una pieza de terreno y mirar de cobrir-ie qualsiquier fembra que trascruze por o suyo territorio.
As zebras de Grevy habitan o norte de Kenia, dende la ribera d'o río Tana dica l'este d'o laco Turkana. Solament que existe n'esta parte d'o norte de Kenia y n'una parte más d'Etiopía, a on que se cobillan só que qualques millars d'exemplars. A zebra de Grevy ocupa lo nincho d'entre meyo d'a zebra común (más dependedera de l'augua) y los burros salvaches (d'ambients más xucos). Habita en as planas d'o centro d'Africa, a on que i troba hierba y lastons anque sean xucos pa paixentar-se. En a naturaleza, s'asocia en ramadas con as zebras comuns, ramadas en as quals siempre predominan as Grevys. Se conoixe que a tamas d'a suya convivencia las dos especies no s'hibridan en o medio natural.
De día u de nueit, a zebra de Grevy tien un comportamiento social de raso diferent d'a zebra común. A suya sociabilidat ye semilar, anque sindembargo la zebra de Grevy ye territorial y forma grupos obiertos, sin de cohesión. A la contra que la zebra común, l'aseyo reciproco no lo han muito orminoso. A unidat basica d'a suya sociedat ye una fembra con o suyo potro, u con os suyos dos u tres potros más chóvens. Estas familias son combinadas en grupos de 2 a 10 fembras con os suyos chóvens, anque son poco duraderas y se desfan facilment. Os grupos tamién pueden incluyir atras especies de zebras, como las comuns, y incluso especies d'antilopes. En as sequeras, os grupos solen incluyir muitos más exemplars, con rebanyos mixtos de 100 u 200 eixemplars, que a ormino brincan ta os 450 animals. Os rebanyos migran chuntos ta buscar-se millor pasto anque dempués se dispersan pa no fer-se estorbo cuando falta la hierba.
Os mastos adultos son solitarios y territorials. Cheneralment, han territorios d'uns 6 km2, las buegas d'os quals solen a coincidir con accidents topograficos como la lera d'un arrueyo u semilar. Os bartos marcan os lemites d'os suyos dominios con orina y pilas de bonya, antimás de tener lo costumbre de fer-se notar a presencia fisica con o suyo grito, contracia d'o relinco d'o somero y lo ronque d'o hipopotamo. A ormino, y si las condicions d'augua y alimento son adequatas, os mastos más territorials pueden permaneixer incluso en os suyos territorios por mientres tot l'anyo, sin de chuntar-se con as migracions con as quals sólo marcharían as fembras, que las pueden aguardar que tornarán con o tempero de criar. Os mastos territorialss tamién socializan en as buegas d'os suyos territorios por mano de tot un ligallo de rituals, y ocasionalment con barallas eventuals en as quals as bestias se pretan os cuellos y mosigan o suyo adversario y se sueltan firmes calces.
Masto adulto.
Fembra con o poltrillón
Chacendo en tierra
A zebra de Grevy (Equus grevyi (Oustalet, 1882)) ye una zebra en grau recesión d'o centro-este d'Africa. Ye la más gran de todas las zebras y tien muitas rayas verticals que son muit chuntas, más que no en as altras especies, y tamién as orellas grans y redondas que la fan de reconoixer quan la se veye. Anque ye de plano más gran y más fuerte que no la zebra d'as planas, ye más deficil d'entrenar-la, por lo que nunca no la s'ha mirato de domesticar.
Una carateristica social d'a zebra de Grevy ye que por contra de como fan as altras especies de zebras, os mastos d'ésta no forman harems. A suya estratechia ye prener lo control d'una pieza de terreno y mirar de cobrir-ie qualsiquier fembra que trascruze por o suyo territorio.
