Hoary Cress

Šipojta žerchej (Lepidium draba) je rostlina ze swójby křižnokwětnych rostlinow (Brassicaceae). W někotrych žórłach so jako Cardaria draba wodźe.

Wopisanje

Šipojta žerchej je trajne zelo, kotrež docpěwa wysokosć wot 20 hač 50 cm.

Stołpik njese wjele łopjenow.

Łopjena

Łopjena su dołhoće-jejkojte, njeprawidłownje zubate. Delnje łopjena su stołpikate, zubate a zahe zwjadnu. Hornje łopjena stołpik wobpřimaja.

Kćenja

Kćěje wot meje hač julija. Běłe kćenja docpěwaja šěrokosć wot 5 hač 6 mm a wobsteja z štyri wopak-jejkojtych, 3-4 mm dołhich krónowych łopješkow. Wone steja w hustych kićach, při čimž wjace kićow pozdatny wokołk wutwori.

Płody

Truki su wutrobojte, lědma wopłonjene, njekřidłaty a docpěwaja šěrokosć wot 4 hač 5 mm.

Stejnišćo

Rosće w njerodźowych wobrostach na pućach, nadróžnych kromach, železniskich nasypach, drjebiznowych městnach a winicach. Preferuje suche, zwjetša małohumusowe, bazowe pódy.

Rozšěrjenje

Rostlina je w srjedźnej a južnej Europje rozšěrjena, mjeztym pochadźa originalnje ze srjedźneje Azije a juhowuchodneje Europy a so je wosrjedźa 19. lětstotka za čas natwarjenju železnicowych linijow sylnje rozšěriła.

Nóžki

1. ↑ Pawoł Völkel: Prawopisny słownik hornjoserbskeje rěče. Hornjoserbsko-němski słownik. Ludowe nakładnistwo Domowina, Budyšin 2005, ISBN 3-7420-1920-1, str. 673.
2. ↑ W internetowym słowniku: Kresse

Žórła

• Schauer - Caspari: Pflanzenführer für unterwegs, ISBN 978-3-8354-0354-3, 2. nakład, 2008, strona 20 (němsce)
• Spohn, Aichele, Golte-Bechtle, Spohn: Was blüht denn da? Kosmos Naturführer (2008), ISBN 978-3-440-11379-0, strona 122 (němsce)
• Brankačk, Jurij: Wobrazowy słownik hornjoserbskich rostlinskich mjenow na CD ROM. Rěčny centrum WITAJ, wudaće za serbske šule. Budyšin 2005.
• Kubát, K. (Hlavní editor): Klíč ke květeně České republiky. Academia, Praha (2002)
• Lajnert, Jan: Rostlinske mjena. Serbske. Němske. Łaćanske. Rjadowane po přirodnym systemje. Volk und Wissen Volkseigener Verlag Berlin (1954)
• Rězak, Filip: Němsko-serbski wšowědny słownik hornjołužiskeje rěče. Donnerhak, Budyšin (1920)

Eksterne wotkazy

Hlej wotpowědne dataje we Wikimedia Commons:
Šipojta žerchej

• Šipojta žerchej. W: FloraWeb.de. (němsce)