Hoary Cress

Šypojta krjasa (Lepidium draba) jo rostlina ze swójźby kśicnokwětarjowych rostlinow (Brassicaceae). W někotarych žrědłach se ako (Cardaria draba) wóźi.

Wopisanje

Šypojta krjasa jo trajne zele, kótarež dośěgnjo wusokosć wót 20 až 50 cm.

Kijašk njaso wjele łopjenow.

Łopjena

Łopjena su pódłujko-jajojte, njepšawidłownje zubate. Dolne łopjena su wogonkate, zubate a rano prěju. Górne łopjena kijašk wobpśimaju.

Kwiśonki

Kwiśo wót maja až do julija. Běłe kwiśonki dośěgnu šyrokosć wót 5 až do 6 mm a wobstoje z styri wopak-jajojtych, 3-4 mm dłujkich kronowych łopjeńkow. Wóni stoje w gustych granach, pśi comž wěcej granow pózdatnu wokołku wutwóri.

Płody

Tšuki su wutšobojte, lěbda wopłonjone, njekśidłaty a dośěgnu šyrokosć wót 4 až do 5 mm.

Stojnišćo

Rosćo w zelišćowych wobrostach na drogach, nadroznych kšomach, zeleznicowych nasypach, kamuškowych městnach a winicach. Ma lubjej suche, zwětšego małohumusowe, bazowe zemje.

Rozšyrjenje

Rostlina jo w srjejźnej a pódpołdnjowej Europje rozšyrjona, mjaztym až póchada originalnje ze srjejźneje Azije a krotkozajtšneje Europy a se jo dosrjejźa 19. lětstotka za cas natwarjenju zeleznicowych linijow mócnje rozšyriła.

Nožki

1. ↑ W internetowem słowniku: Kresse, pśełožk: wěrcowańska krjasa
2. ↑ Dolnoserbske terminusy za bramborske šule, bok 242, pśełožk: (wěrcowańska) krjasa za Kresse a Gewürzkresse

Žrědła

• Schauer - Caspari: Pflanzenführer für unterwegs, ISBN 978-3-8354-0354-3, 2. nakład, 2008, bok 20 (nim.)
• Spohn, Aichele, Golte-Bechtle, Spohn: Was blüht denn da? Kosmos Naturführer (2008), ISBN 978-3-440-11379-0, bok 122 (nim.)