Kuhankeittäjä

èn ôrimiele dizeu s' ni (portrait saetchî pa Léon Demarche)

oûs d' ôrimiele

Èn ôrimiele (on dit eto: on copere-loriot, èn ariole, on colåd-piråd, on måvi d' ôr)^[1], c' est on gros djaene moxhon come les sprewes avou des noers penas (pol måye), mins foirt catchete, et målåjhey a vey; li frumele est bråmint pus ptite et avou ene vete coleur.

A cåze di ses plomes di coleur d' ôr, on li spote cobén li rwè des bwès.

No d' l' indje e sincieus latén : : Oriolus oriolus

Famile : spriwidîs

Li vicaedje di l' ôrimiele

L' ôrimiele fwait on ni pindou après les coxhes.

C' est ôrimiele est èn oujhea foirt pawoureus. On nel voet ki bén rålmint. Il est foirt midone avou ses djonnes, ki magnèt des ceréjhes et des halenes.

L' ôrimiele arive el Walonreye e moes d' may; il est la tins do fenåmoes. Did la onk des xhinaedjes di s' tchant, "Dixhombrez vs, i va ploure".

I revole eviè les tchôds payis docô k' ses djonnes sont-st aclevés.^[2]

Tos les ôtes nos walons d' l' ôrimiele

• loriot.
• copere-loriot, copere-Mårtén.
• ariole.
• colåd-piråd,
• måvi d' ôr (dins l' payis d' Vizé).
• l' amisse-Pierot.

Xhinaedje di s' xhufla

L' ôrimiele hene on djoyeus xhuflaedje, del môde "dileliyo-didlo". Did la, tos les xhinaedjes di s' xhufla

Pask' i magne voltî des ceréjhes

• Ramexhné a Inne-Sint-Pire:

Copere-loriot, gn a-t i co des ceréjhes å bos ? (u: gn a-t i tant des ceréjhes å bos ?)

C' est nén por vos, c' est po m' gaviot.

• Ramexhné a Bujnal

Loriot, loriot, n a-t i co des ceréjhes låvå ? (u: Voet on ceréjhes låvå ?)

Gn a bråmint mins c' est po m' goziô.

• Ramexhné a Gochnêye.

Loriot, loriot, est ç' k' i gn a des ceréjhes låvå ?

Non, gn a pus k' des pikes et des picots.

• Ramexhné a Voroû.

Ås ceréjhes, ceréjhes, Pierot !

A l' anêye, nd årè-t i co ?

Nos magnrans piretes eto.

u:

Ass des pious, Pierot ?

Dj' end a waire, mins i sont gros ! (u: mins c' est des gros !)

• Ramexhné a Tchô

Loriot, loriot, les ceréjhes sont ele maweures ?

Rexhe, rexhe å gozî.

• Ramexhné a Djnape

Loriot, loriot, les ceréjhes sont ele maweures ?

Des grintches å trô !

• Ramexhné al Lovire:

Loriot, loriot, les ceréjhes sont ele meures å bos ?

Way, mins nd a co k' ene,

Et c' est po m' feme.

Ôtes tinmes

• pask' i rvént å tins k' on aléve siyî les crouwås (inds les dinrêyes, les canadas, evnd.)

Colåd-Piråd,

Magrite est ås crouwås

Les bounès grintches !^[3]

• pask' i rvént å fenåmoes

Dixhombrez vs, i va ploure !^[4]

L' ôrimiele dins les nos d' plaeces del Walonreye

• Rowe di l' ôrimiele: rowe di Spå.

L' ôrimiele dins les belès letes

• Dins l' live "Droles di biesses" da Marcel Slangen

Hårdêye difoûtrinne

Portraits d' l' ôrimiele

Sourdants

1. ↑ Po tos les nos e walon, et leus accints, loukîz al notule ALW 8 54.
2. ↑ Léon Demarche, L' ôrimiele ou måvi d' ôr, Cotcorico l° 3, esté 2007.
3. ↑ A.L.W. 8, notule 54.
4. ↑ Léon Demarche, come cité ådzeu.